個市連升9日，恒指進帳647點後，昨日有啲攰，回落24點。吊頸都要唞吓氣，儘管大勢仍然向上，短期內，難免要調整一吓，例如回落三兩日。短期向淡炒，當然可以揀啲股票P輪埋手，但睇吓溢價，心理上過唔到關，可以諗吓指數P輪。指數P輪溢價較低，冇直接揸股票P輪咁蝕底。造淡，揸指數P輪，注碼怡情算數，都要提防挾淡倉。
恒指P輪9142：短線向下炒，買恒指P輪9142，呢隻係新貨，出爐3日，發行價26仙，昨日19.9仙，原始接貨者揩嘢，不過輸家有限，因為街貨得1.8%，只有3.3球。但昨日有864球易手，比發行量385球多出1.2倍，又相等於街貨262倍，係最熱恒指P輪，有嘢做緊，睇吓向上搞抑或向下搞。
9142數據OK，明年1月尾夠鐘，溢價4.6%，槓桿率20.9倍（有效9.8倍），引伸波幅17.6%。
中企P輪3958：國指收5161，高位有可能先調整，搵中企指數P輪落手，3958最諗得過。隻輪9月底到期，輪價13.4仙，溢價1.7%，槓桿率15.9倍（有效10.9倍），引伸波幅20.4%。同類輪有幾隻溢價過高，買唔落手。
國企指數昨日稍回12點，但9RSI仍達79.8超買地步，揸3958等國指調整，應該搵到啖食。
章盛