科大噚日舉行巨額捐款儀式，除咗捐八億嘅全國政協副主席霍英東，重有科大副監督「大蛇」鍾士元。兩位除咗政治地位屬重量級，重有都係年紀大，霍老已八十二歲，大蛇則已八十七歲半，即兩人加埋成一百六十九歲。
不過八方見到兩位長者仍十分有魄力，霍老一身健康膚色，相信係經常游水嘅成果。佢由科大俗稱「火雞」標誌嘅位置，行到捐贈儀式會場，完全唔使人扶持，講嘢更加係中氣十足。
至於大蛇，雖然要用枴杖，但依然可以自己步行。不過呢位長者嘅腦筋重好靈活，轉數好快，陳佐洱話唔聽話嘅立法會議員唔可以北上，噚日八方同啲行家就問大蛇點睇，佢話「我已經退休，政治嘅嘢唔好問我」；點知當一眾行家訪問緊霍老時，佢又大開金口講番件事，又評論煲呔重組行會計劃同佢嘅管治成績，大蛇真係好嘢。
爆料熱線：29290000、27860099
報料傳真：26239278
報料電郵：[email protected]