自由黨主席田北俊最近開口埋口，都鍾意講珠三角空氣污染問題，不過，講到環保呢家嘢，始終唔係田少嗰瓣，所以噚日佢去電台做訪問，講完半粒鐘空氣污染之後，離開時見到一大班記者，都係忍唔住講番對行會改革嘅意見。田少話煲呔請啲無黨派人士入去係冇用嘅，因為喺立法會箍唔到票云云，可見佢對行會幾熱心，恨重返行會之心好難掩飾。
八方覺得田少都唔使咁恨嘅，事關煲呔一向冷對行會，就算叫咗你入去，咪又係叫你同民建聯一樣喺立法會舉吓手，做吓舉手黨，作用始終唔大。除非田少好想多啲舉手當做運動，否則都唔入好過入。
之但係，田少又未必係咁睇喎，因為權力嘅嘢始終好吸引，加上周梁只係自由黨副主席，田少當然認為佢阿姐代表唔到自由黨啦。
爆料熱線：29290000、27860099
報料傳真：26239278
報料電郵：[email protected]