醫管局應先做好節流
中產之聲主席 李子榮
「我反對醫療供款，供人工1%都太多。中產納咁多稅，經已盡晒公民義務，再要我哋供款等於雙重徵稅。好多中產家庭每年花幾萬蚊買醫療保險，要我哋額外供款，除非政府肯推出保險扣稅，同寬減稅務優惠。政府成日話唔夠錢，應先精簡醫管局架構，做好節流工作。」
月供2%由政府包底
社區組織協會病人權益幹事 彭鴻昌
「醫療始終係個人責任，我哋同意市民承擔一部份開支，但係如果要供5-7%，轉變太大，冇人會接受。我哋主張沿用𠵱家以公帑補貼醫療開支嘅做法，擴闊稅基，增加稅收來源，再喺呢個基礎上推行強制性個人醫療保險計劃，每人供1-2%，再由政府包底，咁樣就有得諗。」
如供款太多甚難負擔
患紅斑狼瘡的長期病患 鍾惠玲
「我每個月一至兩成嘅人工用在醫療上，有啲長期病患者甚至要用一半人工去睇醫生，可以話個個月都同醫生分身家。如果要我哋再畀醫療供款，我希望比例唔好太多，如果佔人工1-2%都可以接受，否則真係會好難負擔。」
「每月10蚊我就贊成」
單親媽媽 符瓊娟
「一人一個月供五蚊十蚊我就贊成，積少成多吖嘛。再多啲就梗係唔得啦，一下子要人拎咁多錢出來，一定冇人想供。我月入得五千，每個月要供二百五十蚊強積金，又要供個女讀書，交埋電費房租，啲錢月月清，重邊有錢供款呀？」
