白鴿黨處理涂謹申嘅「滙標事件」可謂進退失據，俾人有機可乘。
君不見，老廉一話有新證據要再查，班土共同老左馬上喜上眉梢，跳晒出嚟，大聲疾呼叫阿涂辭職，幾份親中報章更力數涂謹申十宗八宗罪，誓要拉佢下馬先肯罷休。親中陣營之瘋狂程度，已經近乎文革批鬥，認真嚇人。
八方噚日同一位民主黨中人分析涂謹申事件，佢都承認個黨做每一步都搞錯，同當年老董有得比，每次想拖延押後件事，就每次搞得更差。
好似當初成立三人小組，就只係一諗到就做，畀得華叔三分鐘時間考慮，你話幾急呢？之後既然搵到李志喜同馬紹援幫手調查，就冇理由急急推出一份未得三人小組同意嘅撮要，結果人哋李志喜一出聲，四小時後又急急推出原文，你話係咪好似老懵董一樣咁冇能。
𠵱家真係民主黨同阿涂攬住一齊死，黨主席李永達喺最危急之時去咗放假，其他人就唔講嘢話等老廉報告，還涂謹申清白，八方真係唔知阿涂頂得幾耐，呢單嘢好多人都等睇戲，你話政治幾殘酷？
爆料熱線：29290000、27860099
報料傳真：26239278
報料電郵：[email protected]