自從泰興（389）事件後，二三線工業股始終難以好似前兩年咁，獲得基金經理垂青，就算業績靚靚亦都唔例外，例如泳衣股德發集團（928），雖然剛公布嘅業績好靚仔，但近排股價一直升唔起，原因就係芬佬沽貨。
經紀黃話，本來揸住8%德發的金手指，近排亦加入沽貨行列，令德發股價受壓。
德發昨日公布截至今年3月底全年業績，盈利有成1.55億元，比舊年增加27.8%，同埋有末期股息2仙派。業績在中午公布，但德發股價昨日仍跌1.1%，收0.90元，成交股數273.6萬股，金額248.5萬元。
原本德發先前收購美國少女服裝品牌Mudd，一度為證券界看好，但家陣芬佬轉view沽貨，到底係唔睇好或者係其他原因，尚待查證，但德發由呢個月的高位1.15元，回落至家陣的0.90元，相信都有一定啟示。
另外，自中盛糧油（1194）因大豆期貨對沖錄得虧損，令股價大跌後，同類股中國糧油（506）亦受波及，股價昨日下跌4.1%，收3.45元，家陣四川又話豬肉有事，睇嚟呢一排對啲糧油食品股都要小心啲為妙。
慕容小初