咬蘋果：潮人×象棋<br>廿皮殘局愈輸愈要捉潮人唔挑機挑阿伯

咬蘋果：潮人×象棋
廿皮殘局愈輸愈要捉潮人唔挑機挑阿伯

阿伯捉象棋正常過正常，擺地攤殘局呃餐晏仔亦唔奇，奇就奇在地攤擺喺旺角地標朗豪坊對面砵蘭街，而對手並唔只阿叔阿伯，竟然連一眾打扮入時的潮人後生仔亦着住對NikeAirForce1踎晒地喪捉象棋，點解有機舖唔入有機唔挑改而單挑阿伯，輸咗重要現兜兜即科廿皮？一句到尾唔忿氣，愈輸要愈捉！

記者：招佩珊　攝影：陳陶鈞

■紅棋先行、長將作負，寫明規則。

■另一棋檔擺在近豉油街的行人隧道口。

潮場開業帶旺棋檔

近幾晚，記者一步出旺角地鐵站雅蘭酒店出口，即見幾個一身潮Look的後生仔，中間夾住幾個麻甩佬圍埋一堆，視線全部聚焦在地上的8副象棋，原來有兩位阿伯擺地攤殘局！細問潮友，先知兩位阿伯下午5時準時開工，年中無休晚晚擺局至凌晨3時，十次有九次擺在雅蘭酒店側門對出空地，拍攝當日可能太陽西斜曬到應，先稍移玉步改擺砵蘭街對正朗豪坊一段行人路。
不得不讚阿伯好有商業頭腦，識揀位擺正朗豪坊必經之路，事實上自朗豪坊開業後，確實多咗後生仔行這一帶，呢班潮人唔只圍觀，有時手痕痕甚至會落場捉番一兩局；而兩街之隔的豉油街亦有另一棋檔，不過大抵因為偏離朗豪坊，附近又是寶力湖桑拿、金如意卡拉OK夜總會等夜店出入口，加上四周光線較暗，觀察半小時都唔覺有潮友圍觀，觀棋同捉棋都係阿叔阿伯級。

■「陳一陣」好少出聲沉着應戰，同時應付兩個對手一樣贏晒：「贏到棋，咪可以沙塵一陣囉。」

■「陳一笑」似開籠雀，經常撩潮人單挑隻抽：「後生仔怕乜嘢輸？輸咗咪得啖笑囉！落嚟捉番鋪！」

潮人貪玩阿伯搵食

據一不知名砵蘭街街坊透露，這殘局攤檔至少有七八年歷史，以前的挑戰者多數是同年紀阿叔阿伯，近排暑假先多咗潮人參與。拍攝當日，記者發現平均每15分鐘就有4個潮人圍埋去觀棋，1小時之內就有6個潮人單挑，不過全部都輸！兩位阿伯各有花朵，白髮阿伯自號「陳一陣」，黑髮阿伯自號「陳一笑」，兩人拍住上輸贏對半，以每局$20計，每人時薪$60袋袋平安，一晚擺檔10小時，齋坐唔使做保守估計至少有$600，當然，遇着嗰晚啲人齋睇多過捉棋，收入真係少之又少。

單挑有Say

■潮人4號Steve：「間唔中都上網捉棋，阿伯勁呀，我食咗佢4隻卒咋，自己啲車馬炮剩番幾隻，玩咗15分鐘就俾佢將軍，好勁。」

■型仔捉棋女仔昅，潮人1號German：「平時都有喺公園同阿伯捉棋，殘局好惡捉，不過愈難愈要捉呀！」

■潮人5號Michael：「行咗4步就輸，都預咗，貪過癮。」

■潮人3號劉先生企咗15分鐘，手指指。

■終於落場！

■行4步，即Die！「第一次喺街同阿伯捉棋，$20一鋪咪玩吓，當幫吓阿伯。」

網上玩家𠝹女單刀直入

不少網站都提供象棋遊戲，新浪網的SINAGAME更分「新手休閒區」及「高手比試區」，兩區都可以畀玩家邊捉棋邊好似玩ICQ咁同對方搭訕。棋藝麻麻的記者先挑戰「高手區」，發覺個個玩家都有過千盤勝局記錄，隨便挑戰一個玩家，4步即輸！怕且嫌記者水皮，對方即時離場完全係實戰型。相反去到「新手區」就吹水多過認真玩，試過玩唔夠2分鐘，一名叫「屎急馬行田」的玩家已問記者有無男友，重要攞埋ICQ冧巴，捉象棋俾仔𠝹，咁都得？（網址： http://game.sina.com.hk/cgi-bin/ja/main.cgi）