近期不時發生議員濫用、詐騙公帑醜聞，民政事務總署噚晚連同廉署，喺科學館舉行講座向議員同議員助理解釋申領公帑指引同埋要注意嘅地方，唔少區議員都有出席。據講元朗區議員最支持，而民主派亦有唔少人到場，包括觀塘區議員蘇家豪同蔡澤雄，早前觀塘區議會多名議員被廉署調查，區議員確有需要聽清楚指引解釋，涂謹申則唔見人。
與會者稱，會上有人提出可唔可以租用親友物業或黨產作議員辦事處問題，廉署人員話根據指引無話唔得，但發生咁多爭議後，建議議員租用物業應該「以公眾利益為最優先考慮」，否則俾人投訴就唔係幾好啦。
廉署人員噚晚亦以多宗區議員詐騙公帑案作例子解釋申領公帑指引，但就無提涂謹申事件，至於觀塘區議會嗰單，由於仍在調查中，暫時不便置評。
爆料熱線：29290000、27860099
報料傳真：26239278
報料電郵：[email protected]