宣傳梳乎　又食又拎
馮仁昭四圍超：金泰喜狂讚港男鋪後路

韓國靚女金泰喜日前喺有線邀請下，嚟香港宣傳韓劇《哈佛愛情故事》，前晚佢同隨行人員去咗蘭桂坊食意大利菜，之後直落蒲吧。金泰喜噚日又去咗中環參觀Bvlgari專門店，重收咗隻BvlgariCarbongold限量版嘅手表，搞到佢鬼咁開心。
金泰喜對香港印象都唔錯，佢話啲海鮮好食，啲衫又靚，好想抽時間行街shopping，又話如果時間許可，都想到山頂睇夜景。

有興趣來港發展

金泰喜重大讚香港靚仔多，佢話：「香港啲男仔好有禮貌好溫柔，做香港女仔真係好幸福。」金泰喜大送秋波，表明有興趣嚟香港發展，不過佢淨係識得周潤發、張國榮同劉德華呢幾位明星，其他港星佢就唔多識。雖然係咁，金泰喜話如果有機會嚟香港拍戲，都想同唔同嘅港星合作喎。