「4樓有四仔，四仔喺4樓……」四仔阿叔如機械人般的重複播帶聲音不復再，昔日全天候賣鹹碟的旺角好景商場已成追憶，以為此場從此黯然，點知原來靜靜起革命，1樓大洗底再無「好景=四仔場」呢回事，2樓重開始有潮舖進駐，誓要成為一個女生會到潮人會蒲的新蒲點。
記者：黃藹瑩
攝影：黃子偉
模特兒：Katie、Carrie
潮舖逐間睇
話明洗底，商場1樓鹹碟檔全部冚旗，二樓就全部做正經生意，全層總共有79個舖位，暫時出租一半，8月1日先正式開幕，𠵱家係試業階段，大部份舖頭賣年輕人潮貨，商場管理阿頭利先生透露：「好景始終係旺場，8月中會有幾間水貨化妝舖開張，遲啲3樓同4樓會搞Cafe同漫畫城，總之就要啲女仔再次蒲好景！」記者率先逛，發現以下3檔最值逛……
Exclusive 猿人竇（Shop20）
店主Mike同Jason首次創業，揀好景完全貪個場夠新：「地方細不過算實用，租金比起其他旺角大場平！都唔怕影響形象嘅，商埸話開幕前會搞好多宣傳，試吓囉！我哋啲貨全部日本返，希望可以做到口碑喇。」
uber 平價日本Tee（Shop27）
店主寶文：「搞生意要博，橫掂要博不如博好景，至少租金平！我間舖70呎租$4,000，潮特地庫大少少都要$20,000！都怕人流唔夠㗎，警察掃場反而少咗人行，所以我買一送一，希望谷得起喇。」
09nine 美國板牌集中地（Shop51）
新開張板牌一律9折，店主Rico：「旺角其他大場舖租貴之餘啲人重睇多過買，好景反而多人會幫襯。雖然商場重未有太多宣傳，不過人流算OK，不過好奇怪喎，星期六日一家大細重多過年輕人嚟逛。」
洗底前後：1樓vs2樓
走廊
1樓：雖然四仔檔全部收檔，不過走廊重係好窄燈光又暗，死氣沉沉煙霧瀰漫。
2樓：走廊雖然唔係闊咗好多，不過起碼光光猛猛似番個潮場！
室溫
1樓：攝氏30度，以前勁人迫，麻甩佬買鹹碟出晒汗，𠵱家無晒四仔檔但一樣咁熱，可能重有人煲煙啩？
2樓：攝氏25度，無人煲煙，空氣流通，涼浸浸行得舒服！
洗手間
好景1樓有無洗手間呢？老實講記者呢亭卜卜脆美少女唔敢考證，2樓就唔同嘞，洗手間設在當眼處，方便易搵！
四仔大叔
昔日的四仔大叔𠵱家唔敢喺正門蒲頭播帶，閃晒上1樓電梯口改派卡片，竇口亦搬往鄰近的彌敦中心與好望角大廈，卡片名好搞鬼，又「創世紀公司」又「老友記公司」咁，老作咁多咪又係四仔檔？
女生點睇？
