煲呔曾坐正第一擊，去四川成都參加第二屆泛珠論壇，呢個泛珠三角，由福建、江西、湖南、廣東，一直到廣西、海南、四川、貴州以及雲南，連香港同澳門兩個特區都包埋入去，涵蓋面認真廣闊。「9+2」論壇，有成十一位領導加埋班代表團坐喺度開會，想有成就都好難，煲呔當然明知冇料到，但係樂得有個場合同國內一、二把手打吓關係，三日來回都碌到率團去啦。
人在四川應該探訪疫區
點知人算不如天算，佢老哥同太座一到，人哋四川嘅資陽同內江發豬瘟，死咗十幾人，真係大吉利是。好彩煲呔有名「襟撈曾」，第一時間就拜地主，同四川省省委書記張學忠見面，重主動提出可以伸出援手；嗱，呢啲認真識做，因為知道祖國一定唔使香港幫，賣個順水人情有乜所謂。
八方認為，佢老哥既然咁啱人在四川，唔應該只係得把口講，應該要行動，約埋腳頭甚好嘅澳門特首何厚鏵，一齊去疫區探訪吓，落實「以民為本」嘅崇高理想，如果到時有農民攔途求助，咪發動班有錢佬大孖沙去行一趟，捐吓錢。又或者出位啲，叫齊班隨團高官如曾俊華、馬時亨、李淑儀同謝肅方嚟，當住啲記者面前食四川豬肉，咁就有睇頭啦。
中國官場文化重有排學
點知煲呔問候吓就算數，噚日論壇一開幕，佢又想做龍頭大佬。佢同記者講，香港喺三方面特別可以同九省加強合作，包括金融、CEPA同埋物流。重話準備派馬時亨今年九月帶個金融業界代表團去訪問福建省，大有佢當年帶啲有錢佬去大西北一樣豪氣，實行銀彈政策，省長黃小晶梗係高興啦。另外，佢老哥重宣布明年三月會喺香港搞個「泛珠區域合作金融服務發展論壇」，真係慌住做唔死班馬仔。
唉，煲呔真係唔識死，你睇鏵哥喺國內點會咁巴閉、咁霸氣呀。都話背靠祖國，珠九省舊年雖然有成二千五百幾億美元嘅貨物經香港轉口進出，但唔等於由你做龍頭。呢啲中國式含糊，煲呔一定唔識。煲呔啲普通話愈操愈fit，但係中國官場文化重有排學。
爆料熱線：29290000、27860099
報料傳真：26239278
報料電郵：[email protected]