香港運動員唔係垃圾，香港露宿者亦都唔係臘鴨，喺強敵環伺、水土不適嘅情況下，首次出戰露宿者世界盃嘅中國香港代表隊，結果喺二十七支隊伍當中，排名二十一。雖則排名尾六，但係港隊先後擊退法國、捷克、挪威同瑞典呢啲足球強國，作為一支籌備唔夠一年嘅球隊嚟講，都算唔失禮囉。
露宿者代表隊亦叫曙光隊，幾經艱苦先籌夠經費參賽。賽事喺蘇格蘭愛丁堡舉行，賽事初期，曙光隊員水土不服，戰績唔多好，一比九大敗喺葡萄牙腳下，互射六碼球又輸埋，要打遺材賽。不過後半階段就漸入佳境，代表作當然係狂數捷克七個一皮。
不過呢啲數字上嘅戰績都係事小，最緊要係一班流浪街頭嘅露宿者不再潦倒，足球為佢哋重新帶來人生希望，又獲得有心人支持，踏上人生另一征途。曙光隊今日下晝五點會返到香港，市民不妨到場畀啲鼓勵佢哋。
爆料熱線：29290000、27860099
報料傳真：26239278
報料電郵：[email protected]