恒指升7點，上升恒指股14隻，下跌恒指股16隻，3隻冇郁。中海油（883）落完又上，進帳3格，拉高恒指20點。和黃（013）跌45仙，又扯低恒指6點。大市喺高位反覆，見低位宜買C輪博反彈執些少，再升則唔適宜高追搶貨。
國壽C輪4750：國壽（2628）收5.60元，跌1格，過去4日，做緊支旗，估計做完之後，有望彈上挨近6元嗰頭。國壽C輪，普遍對正股變化反應敏感，正股昨日只跌1格，好幾隻熱門貨就唔見10%以上。下一回合，正股回升三兩格，揸C輪則有機會賺得開開心心。
國壽C輪4750昨散12%，開始諗得過。隻輪9月尾夠鐘，輪價30.5仙，溢價3.7%，槓桿率18.4倍（有效11.2倍），引伸波幅24.6%。想贏輸都細啲，則買4853，11月中夠鐘，輪價58仙，溢價3.2%，槓桿率9.7倍（有效7.2倍），引伸波幅25.2%。
滙控C輪3541：滙控（005）升30仙，C輪3541忽然鹹魚翻生，由1.1仙飛上3.3仙，足足好咗兩倍。有104球易手，銀碼3球。
3541喺9月初夠鐘，行使價135元，正股（昨收127元）個幾月內升唔夠8元，隻輪冇渣。想刀仔鋸大樹，先諗吓刀仔易斷而樹難鋸。炒滙控C輪，向壽命稍長、溢價冇咁高嘅埋手，實際好多。
章盛