港股連升多日，恒指升近14800水平後，終於有公司走出嚟配股集資，其中當然以江西銅業（358）發新股集資9億元最勁抽，傳聞重話幾粒鐘唔夠就搞掂晒，另外，早前傳聞多多嘅中意控股（1198），亦傳收市後搞股份配售。
當大市急升後，有公司出嚟抽水，是否意味升市差唔多呢？呢一點就真係言人人殊，但反正大市升咗咁多，昨日成交明顯細咗，大市就算要唞唞氣亦好應該。
另外，呢排陸續有公司公布業績，其中早前在炒半導體熱潮中股價累積升幅唔細嘅ASM太平洋（522），將於今日公布中期業績。經紀黃話，雖然全世界分析員都預期佢嘅業績會倒退，但因為定單喺第二季明顯回升，預計下半年公司盈利將會由谷底顯著回升，所以就算隻股在過去兩個月已經升咗兩成咁滯，但仍然睇好，相信重有上升空間。
ASM在過去兩個月，由33元水平上升，最高見過40.20元，昨日回落2%，收38.10元，成交股數59.3萬股，金額2285.6萬元。
慕容小初