房委會打贏官司，可以將領匯上市，安排得嚟，今年十二月應該可以掛牌。去年十二月十六日本係上市之日，點知俾盧少蘭搞彎咗，今年嘅十二月十六日係大吉日（甲戌，開日）宜開市納財，朝早九至十一時（上市儀式舉行之時）又係吉時，領匯最好揀呢日掛牌上市。
嗱，時移世易，政治經濟環境已經唔同晒，領匯上市嘅安排，應該有所改變。去年Reits未有乜人認識，保薦人信心不強，猛咁拉攏國際投資者，驚死香港人唔買，點知香港人一見有六厘以上回報，瘋狂認購，李兆基入飛二十億元，只分得二千萬。今年股市成交極之暢旺，交通銀行上市，大家信滙豐入股，就猛咁認購，領匯集資三百幾億，濕濕碎啦，香港人一定掃晒。所以囉喎，左丁山向唐英年、馬時亨、房委會、領匯管理層熱切呼籲，你哋一定要順應民情，將領匯基金全數配售畀香港人，每位認購者保證有一手，唔好去國際配售，取消到美國、歐洲路演。如果財金官員重唔醒目，曾蔭權、許仕仁就要行政干預，透過行政會議發命令，領匯保薦人唔使搞國際配售，只歡迎以香港為基地之基金、強積金認購。
基金經理Ｋ認同左丁山嘅諗法，佢從事基金管理二十年，認為領匯集資，全無困難，保薦人嘅包銷費用（集資額嘅2.5%），直情依絲執，毫無風險可言，畀佢哋搞國際配售，只係益咗保薦人嘅老客仔、好客仔啫；直接啲講，就係攞香港投資者嘅利益去做人情！另外，到外國路演，費時失事，阻慢上市速度，兼惹上美國法律，自討麻煩。基金Ｋ話：「快啲上市越好，新加坡炒Reits，有泡沫迹象，等佢爆咗，領匯先至上市，就失咗形勢。任何會阻慢領匯上市速度嘅事（如出外路演）都唔應該做。」