每逢到暑假，又係名作續篇登場嘅時間！講緊係呢期Game場人人掛住口唇邊問幾時落場嘅《零．刺青之聲》；上集遊戲玩單拖女主角黑澤怜，齋影相捉鬼變化可能不大，今集大玩三人行！除了係舊角色大家熟悉外，人人能力不同，過關、解謎再捉鬼，真係勁考腦筋！不過更重要嘅係今集恐怖氣氛猶勝上集，嗰種失驚無神嚇死人玩法，加落重料嘅鬼聲鬼氣音效，自問膽粗者莫錯過！
記者：許福合
重記得上年有幾隻以恐怖氣氛嘅遊戲差唔多同期推出，令到玩家無咗談論嘅焦點，今次《零．刺青之聲》推出之時，同類作品就比較少，好此道嘅玩家應該唔會放過呢個嚇餐飽嘅機會，所以此作期待度絕對爆燈！
三主角闖鬼屋
上一集嘅《零》，玩家主要操作一名角色冒險，今集就變得熱鬧得多，除咗主角黑澤怜外，重會有第一集出過嘅深紅同男角天倉螢登場，兩女一男嘅故事，自然會多幾分唔同變化，所以感覺上玩遊戲時，幾名主角都幾多嘢講，雖然係咁，奉勸各位都係要多注意佢哋嘅說話，事關從中會有好多過關重點同破綻，尤其係如何收拾妖怪，從中都可以偷到師。三名主角各自有唔同特質，黑澤能力比較平均，而深紅靈力較高，可以快速攝走怨靈，但抵受唔住幾下攻擊，男角天倉螢正好相反，體力較高，被打幾下都唔死得，但要打走怨靈亦要花上唔少時間。隨着故事發展，玩家都有機會操控三名主角冒險，如何利用三人特性定下策略攻擊，就係此作嘅攻略重點。
日式驚嚇氣氛
同外國電影嗰種明刀明槍要嚇你嘅手法唔同，日本式電影往往喺你最唔留神嘅時候嚇你一跳，《零》嘅嚇人手法亦都類似，尤其製造恐怖氣氛嘅手法高明，玩家愈代入遊戲，被嚇時嘅「力度」就愈強烈，就好似遊戲之初講一個身上印有刺青紋身嘅女人，畫面加上氣氛都超正，一邊睇絕對有不寒而慓嘅感覺。而當玩家使用相機拍鬼時，更要小心被嚇親，因為視點變得較窄，怨靈可能會突然出現喺你鏡頭前，真係有機會被嚇到彈起！雖然《零》無用上咩嘢HD畫面、5.1音效，不過筆者仍然提議各位用個大電視，配個靚靚喇叭去玩，事關《零》除咗遊戲性值得一玩外，製造氣氛嘅功力都好出色，喺個細電視玩肯定係浪費。
靈力索敵警告
故事發展主要喺一間「鬼屋」內進行，同上集一樣，玩家都要靠解謎題去過關，謎題可能係對付怨靈，亦可能係做一啲指定動作，而玩遊戲時記緊多注意地圖，因為呢間「鬼屋」相當怪異，當中更會藏有唔少秘道，要靠玩家發現或從地圖先會見到。冒險之時記得要多注意右邊嘅靈力計，當附近有怨靈時，更會有強烈反應，除咗作為警告，有時更可從反應嘅強弱找出正確嘅出路。其實拿相機同拿機關槍技巧都差唔多，一樣係瞄準「射擊」，所以呢方面上手唔難，反而係活用三名主角技能，如天倉識得解讀古文書，黑澤可以聽到怨靈聲音，深紅因為身材嬌小可以走入秘道或做出特殊動作，最重要係可以用「御神鏡」來封印Boss級惡靈，去到後期要合作無間先可應付過關。
遊戲資料
《零‧刺青之聲》
主機：PS2
開發：TEMCO
類型：AVG
推出日期：7月28日
售價：$428
(C)TECMO,LTD.2005