日本近年除咗掀起韓風之外，亦興起台灣及中國明星熱。前日嘅日本報章《東京Sports》就指出有唔少韓星、台星同內地明星，樣貌同日本明星有幾分相似，其中喺日本開始發圍嘅台灣組合F4成員言承旭，雖然曾經俾人話佢似SMAP嘅木村拓哉，但《東京Sports》就指佢似濱崎步男友、TOKIO主音長瀨智也多啲，因為大家都係面長長、重有對電眼嘅肌肉猛男。
而以清純形象殺入荷李活嘅內地女星章子怡，竟然與日本性感女星三浦理惠子有幾分相似。章子怡早排入選美國《People》雜誌全球五十位靚人，連日本人都知佢威水，不過《東京Sports》嘅編輯就覺得佢嘅面形、頰骨、顎骨到鼻形，都好似日本半紅不黑嘅前偶像組合CoCo嘅三十一歲成員三浦理惠子，尤其以眼神最相似，而佢哋最唔同嘅係三浦早排狂拍水着寫真，章子怡並未去到咁激。
宋承憲似警官
重有就係𠵱家服緊兵役嘅韓國男星宋承憲，佢剪咗個陸軍裝入伍之後，竟然被指似《跳躍大搜查線》嘅室井警官柳葉敏郎。不過最頂癮都係韓劇《玻璃花》女主角金荷娜，竟然被指似日本諧星青木沙也加，真係爆笑！