愉景灣呢類咁有度假色彩嘅住宅，一向好難同市區樓相提並論，不過，愉景灣嘅樓價升幅一啲都唔輸蝕，今次成交價就可以同市區中價樓拗手瓜。 美聯潘慶樑話，海澄湖畔二段雙號座數地下連花園單位，剛剛以一千零五十萬成交，近千四方呎，有二千五呎花園，呎價七千五。雖然類型唔同，但係價錢已經拍得住市區。原業主○三年以近八百萬買入，賺咗二百五十幾萬。