貿易Ｗ請咗一個印傭，俾班老友懷疑佢意圖剝削外來傭工，貿易Ｗ好唔高興，正正式式咁同我哋講：「我之請印傭，皆因老婆俾前任菲傭氣壞，故此換人，搵一個曾在新加坡工作，識得六七成廣東話嘅印尼女傭，我哋依足法例，畀足錢，你哋唔好帶上有色眼鏡，以為請親印傭就係想剝削，我好守法律㗎！」印傭上工之後，佢先知道印尼方面嘅中介人為印傭預支一筆活動費搞VISA、護照，打通印尼方面嘅關節，加上佣金，印傭先至可以出境來港，印傭開頭嗰六個月薪水，成二萬銀港紙，全部用嚟還債，斗零冇得落袋，所以印傭好唔想放假，要求星期日開埋工攞補水。
貿易Ｗ話：「我成日出入珠三角，唔怕話你知，最新剝削對象係請內地女傭，用自由行簽證來港三個月，叫做探親，實質住響僱主屋企，eatyou,sleepyou，二千一百蚊一個月，三個月後返羅湖兜過圈，又試嚟過。一位富豪就用呢個方法請咗兩名，一個打掃，一人煮飯，據講煮得一手地道順德菜，富豪好滿意。
既然叫做富豪，就唔好慳錢做違法之事啦，對富豪嚟講，月薪三千六（菲傭最低工資），算得係乜錢？打場高爾夫，都可以輸到三十六萬啦。呢個世界好奇，使冤枉錢就得，畀工資就死都要計到絕。十五年前同一位闊佬食晚飯，佢話佢嘅司機好麻煩，成日要計夜班超時補水，嬲起上嚟，炒咗個司機。左丁山問佢一個月補水，最多有幾多錢，闊佬話：「三千銀左右啦！」究其實，闊佬鍾意去桑拿，每晚畀貼士起碼三百，十晚就三千，畀得唔知幾威風。司機問佢攞補水，立即面黑黑。
貿易Ｗ話佢個印傭做嘢交唔準，老婆心思思又想請番菲傭。香港唔少太太嘅時間就係為咗請外傭、炒外傭、請外傭而讓時光飛逝。