英國大型同志音樂節「BigGayOut」，前日喺倫敦FinsburyPark舉行。呢個被喻為全歐洲最大型嘅同志音樂節，原來事前收到伊斯蘭極端分子發出死亡恐嚇，幸而音樂節當日順利舉行。出席嘉賓好似巨胸名模佐敦（Jordan）、佢未婚夫PeterAndre等，更為音樂節大搞氣氛。
警方加強保安
近日倫敦發生多次連環炸彈襲擊，「BigGayOut」主辦組織話，佢哋早喺上星期收到伊斯蘭教極端分子發出死亡恐嚇，發言人話：「任何有同志出現嘅場合都會成為目標，伊斯蘭教極端分子一向都好憎我哋。所以我哋一早已要求警方加強保安同作出特別嘅安排。」
舉中指搞氣氛
雖然喺音樂節開始時風聲鶴唳，不過當日嘅節目仍順利舉行。好似深受同志歡迎嘅佐敦，當日着住緊身T恤上台講笑話，佢重不時高舉中指搞氣氛。當日有份表演嘅嘉賓，重包括佐敦嘅未婚夫PeterAndre、五人女子組合GirlsAloud等，而傳聞好快拆夥、姬蒂摩絲（KateMoss）男友PeteDoherty嘅樂隊Babyshambles更加係壓軸嘉賓，為音樂節帶來幕幕高潮。
