「英雄莫問出處」，唔少喺商場叱咤風雲嘅商界精英，年輕時都曾經遇過挫折，好似萬寧大中華區行政總裁麥瑞瓊，今時今日統率二千四百個員工，但當年中學畢業出嚟打工，都受過不公平對待。
佢上星期六出席香港女工商及專業人員聯會搞嘅講座，講到當年奮鬥史時話，畢業後喺某酒店做秘書兼行政助理，部門主管唔撈，老闆叫佢頂住主管個位，但有實無名，孭住助理個名但就要做主管嘅工作。做咗整整一年，老闆都唔肯畀佢升正，麥瑞瓊於是拍門入房問老闆，點知佢老闆都好坦白，話嫌麥瑞瓊係秘書出身，又唔係大學畢業，所以唔肯升佢，就係因為呢番話點正麥瑞瓊「死穴」，佢決定另謀高就。
麥瑞瓊話，當年為咗啖氣，搵工第一大條件係個職位要有「經理」兩個字，結果入咗摩托羅拉做助理經理，𠵱家講番起都覺得好笑。
傳真︰2623-9278
電郵︰[email protected]