疑大肚登革熱急就醫
馮仁昭四圍超：何超儀細菌感染留院

何超儀上個禮拜去完日本同泰國旅行返嚟之後，突然覺得好頭痛、發冷同發燒，睇咗幾日醫生都冇起色，病情重愈嚟愈嚴重，連行路都行唔到直線，前晚佢老公陳子聰就陪佢入咗港安醫院檢查，外間傳佢大肚，而醫生就一度懷疑佢喺泰國俾蚊針到，可能患上登革熱病。

搬入病房陪老婆

馮仁昭噚日打過電話畀超儀老友徐濠縈，佢話：「醫生檢查過之後，話佢係細菌感染，導致耳水唔平衡、頭痛、發燒同發冷，唔係有咗，醫生建議佢留院觀察，所以呢兩日唔會出院，等陣我會再去醫院探佢。」子聰當然好擔心老婆，所以前晚就入埋病房住，陪實超儀。而噚日傍晚，除咗徐濠縈外，何超瓊同何超蕸都有去醫院探細妹。