上周恒指再升282點，由倫敦爆炸後至今嘅10個交易日，則共升844點。市底惡，消化後有力再上高位，只不過近期累積升幅唔細，恐怕要先行調整，或至少要整固一下，然後再上一層樓。
埃及紅海旅遊度假勝地，周六又有爆炸，死傷者唔少，要有心理準備，歐美股市會先震一震。港股若先行下跌，回落多少，例如100點上下，可趁低買啲C輪，做短線，博反彈。
新地C輪3906：新地（016）上周五收80.95元，升1.55元，已抵去年1月及12月高位，有可能破位而上，亦有可能稍作調整，例如先回落1-2元，先至破頂，最理想係等佢跌些少，買C輪。
新地C輪啱炒對象係3906，年低夠鐘，輪價52仙，溢價2.8%，槓桿率15.6倍（有效10.3倍），引伸波幅16.6%。另1隻C輪4898，數據同3906差唔多，但壽命短5個禮拜，3906靚過4898一籌。
恒地C輪4593：恒地（012）現價仍低過去年初高位，有啲落後，買C輪4593。隻輪明年1月夠鐘，輪價32仙，溢價2%，槓桿率12.3倍（有效9.1倍），引伸波幅16.4%。成交金額最大嘅，係呢隻。
章盛