煲呔曾生得條命好，陳四萬費盡心思都臨門失機，煲呔幾個月就成事；好似入住禮賓府咁，好多人恨唔到，煲呔就準備年尾搬，搞到四萬都要寫個服字。當然四萬對煲呔唔少所作所為不以為然，覺得煲呔過份，但成王敗寇，咁又點呢？
爵爺上位振英焦急
其實今次曾爵爺上位，最唔服嘅唔係四萬，而係班土共同自命親中或者愛國愛港人士；港英餘孽掌權固然唔順，更火滾係佢哋事前收唔到風，重傻仔咁繼續挺董。記得董建華下台消息透露時，班愛國愛港人士正在北京出席人大政協兩會會議，有位當時身在會場嘅親中人士最近同八方形容，喺眾多張大惑不解嘅面容中，最煩躁不安最焦急嘅係政協常委兼行會成員梁振英，佢肯定比陳永棋、曾鈺成同鄭耀棠緊張。
呢班俊傑，佢哋未必係唔捨得老董，只係冇辦法接受屬於港英陣營嘅煲呔。於是就傳出有一批愛國愛港人士為咗阻止呢件事成為事實，四出活動，企圖救亡。
八方向呢位親中人士求證，佢唔肯講係邊幾位，只係話聽聞呢批愛國愛港人士見勢色唔對，急急跑回香港共謀大計，有冇傾到發動義舉就唔知，結果大家都覺得事態嚴重，要去搵高人幫手。呢個高人你估係邊個，竟然就係董建華喎。唉，老董自身難保，重話連群結黨，真係未死過咩。而煲呔陣營就笑到反肚，係人都知，邊個黃袍加身，決定權在「上便」，若然有料，就北上啦，有乜理由南返呢，一下就俾人睇穿係二仔底。
醒目立即調整思想
講番振英哥，佢驚愕之餘非常醒目，一知道大勢已去，馬上重新調整思想，支持煲呔參選。政治冇永遠敵人嘅，但係振英哥想做番行會非官守議員嘅召集人，就好難咯。
傳真︰2623-9278
電郵︰[email protected]