八方噚日去沙田新城市廣場行街，見到好多西裝友，好似好緊張咁，睇真啲，原來係商場管業人員。隔咗一陣，就見到廣場大業主新鴻基地產嘅太子爺郭炳聯穿便服，由三四個夥計陪同四圍巡視。
新地旗下有唔少商場，郭太子上個禮拜至去完觀塘個apm做嘉賓，今個禮拜又入沙田，真係勤力，抵佢啲場咁旺。講起商場管理，八方諗起領匯上周官司完結，上市有望，但人人話重新估值，都係比去年升值一成。過去大半年市道咁好，租金水平提高咁多，有乜理由升一成咁少？
有知情人話，市道好唔關房委會啲場事。點解？管理差喎。點解管理差？官僚囉。你試吓申請去佢哋啲場搞展銷，睇吓批唔批？（八方噚日見三星在新城市廣場中庭展銷，吸引好多人流）所以領匯撬咗新地一班精英過檔，都英雄無用武之地。
傳真︰2623-9278
電郵︰[email protected]