香港嘅股市受到人民幣升值嘅影響，連日嚟係咁上升，成交額又多，港交所今年業績一定靚仔，八方真係為交易所行政總裁周文耀高興，因為由佢接鄺神童嘅手以來，港股節節上升，連港交所自己嘅股價亦都屢創新高，去到二十三個二，上個禮拜市值去到二百四十六億，重勁過一啲藍籌股，唔單只咁，港交所重帶挈咗唔少公益！
八方此言嘅意思係由於有親新股上市，佢哋都可以揀一個luckynumber做掛牌編號，如果只係喺一堆好意頭嘅數字中，抽一個，要畀五十萬；但係如果想要一個指定靚號碼，就要畀一百萬。收到嘅錢，全部捐晒畀公益金。
四年半捐九千幾萬
呢個制度其實由○○年開始實行，每年都有成二千萬收益，行咗四年半到目前為止，已經合共捐咗九千幾萬畀公益金，數目都唔算細。八方一個月前，曾經寫過公益金表彰善心企業，第三位嘅榮譽獎得獎機構之中，有十四間上市公司就係為咗攞靚號碼而大破慳囊。
八方笑PaulChow，不如以後唔好譴責啲違規嘅上市公司，改為罰錢，然後捐晒做公益事業，周兄就話咁樣做唔係幾好，因為話晒佢哋港交所自己都係上市公司，好似有啲利益衝突喎。
爆料熱線：29290000、27860099
報料傳真：26239278
報料電郵：[email protected]