早排新特首上場之時，咁啱水貨大亨袁仁祥銅鑼灣間舖租約到期，同業主講數，加租近100%，擰晒頭Fing晒手話合理！合理！決定續租兩年，可想而知佢生意果真豬籠入水。最近祥哥生意上又添傑作，一個周末輕易地執過五、六萬利潤。
今次令祥哥賺大錢，乃係由日本Bape同美國絲印書生Kaws合作搞嘅BapeSta牙仔鞋。佢鞋頭滿布鋸齒，造型怪異，加上之前Bape出過嘅KawsApeSta布鞋唔炒得，所以日本炒家並冇留意。相反祥哥之前做足功課，向Fans做簡單調查，知道對鞋有巿場，便決定落重注，發動日本當地嘅大圈排隊黨出動。一個周末，一口氣掃斷東京BusyWorkshop的BapeSta牙仔鞋，此次大手掃貨，立即引來日本當地排隊黨注意，可惜為時已晚，大部份貨已落在祥哥手上。行內人透露，祥哥今次掃入約150-200對鞋，兩日已賣出100對給港人，約套現18萬，獲利近5萬，剩下的遲兩個禮拜再出貨，估計可炒過2,000水位。祥哥此際已計劃另一次行動，因為下一波Bape將聯同美國MarvelComics合作出鞋，祥哥與祥嫂正部署掃貨大計。
主持人：大食Jack
八卦熱報：[email protected]