報業近日風起雲湧，免費報紙呢塊「肥田」愈來愈多人爭住去耕，算係香港免費報紙拓荒者嘅《am730》總編輯盧覺麟噚日喺電台節目中話，當年佢投身首份免費報紙《都市日報》前，同好多行家傾，初時根本冇人睇好，唔少老友更叫佢唔好做，點知不出幾年就賺大錢，佢話證明路係人行出嚟，重話免費報紙其中一個成功秘訣，係政治上保持中立，咁就最易俾大多數讀者接受。
有星島支持嘅《頭條日報》總編輯蕭世和喺同一節目度話，《頭條日報》推出至今，從派報反應評估讀者已接納呢份新報紙。佢話《頭條》係首份香港原創免費報紙，除強調新聞要精簡外，重會有一啲有深度評論文章，「希望讀者可拎返屋企或公司，俾其他人分享。」
蕭世和又話，免費報紙可能會對部份傳統報章廣告收益構成壓力，不過影響程度要視乎個別報章質素。對於早前有報販批評免費報紙令生意額下跌兩成，蕭總反駁日報銷量下跌，可能受馬季同部份球賽結束影響，未必關新報紙事。
爆料熱線：29290000、27860099
報料傳真：26239278
報料電郵：[email protected]