人仔升值2%，麗豐（1125）祖國資產受惠，立時畀反應，上星期五升7%，即日鮮都有得執，但下家可能重肥仔。麗豐祖國物業資產68億銀，投資物業組合包括現成及發展中共56.7億，住宅及聯營公司則11.3億銀。要咁睇，呢勻人仔升值區區2%，情況就好似原本壓到實一實嘅彈簧，稍為鬆手，實彈。
已經有外資估計，人仔未來1年再升值7、8%，總共一成水位。以呢個預測計數，未來1年，麗豐已經可以因為人仔因素，額外增值6.8億銀。數未計完，再中線睇，麗豐資產因租金上調及售樓純利因素，資產值係咁意多10%，又另一個6.8億。麗豐資產增值可以去到13.6億，NAV每股多0.23元去到1.13元，折讓82%，大到離譜。麗豐NAV折讓係咁意收窄10%，股價已經翻半番到0.31元，但其時折讓，重係好誇張。照咁睇，下家真係可以肥過你。
莊中趁有勢兜番轉
莊士中國（298）上星期五冇反應，原封不動，但成交先行，貼近兩球八股數，兼且係今年3月7號以嚟最大成交一日，可以兜番轉。莊中同上邊麗豐，一樣係NAV折讓大嘅祖國地產股，未有人仔因素之前，莊中NAV1.49元，現價（0.42元）折讓近72%。莊中家陣手持待發展及發展中物業11.49億銀，另待售1.34億銀，同理，淨係計算人仔未來升值一成因素，莊中NAV已經可以提升1.28億元，NAV每股增值0.12元去到1.61元，折讓擴大到74%。莊中絕大部份項目係待開發，又當土儲原封不動沽出，無驚無險已經賺咗滙水差價。趁人仔概念有勢，莊中重喺1年低位，兜轉冇問題。
錢雋