黎明和楊采妮主演的新片《七劍》前晚在會展舉行首映，心情極靚的黎明罕有地細數與幾位緋聞女友李嘉欣、舒淇及徐子珊的關係。說話一向摸不着邊際的黎明表示將來有女友的話，會好像人民幣升值一樣，出其不意地介紹給大家。
徐克執導、黎明（Leon）、楊采妮、甄子丹和韓星金素妍等演出的電影《七劍》將於本周五上映，前晚該片在會展舉行首映禮，徐克帶領全體主要演員出席，嘉賓方面則有九倉集團主席吳光正、立法會議員霍震霆和兩位公子、林青霞、蕭芳芳、爾冬陞和工商及科技局局長曾俊華等。黎明前晚心情極佳，記者追問其戀聞時，他罕有地一一回應。
頻通電話
與嘉欣情同兄妹
繼與徐子珊的緋聞後，早前有雜誌拍得黎明和李嘉欣一起出席派對，Leon說：「呢啲嘢真係冇乜好答，嗰晚我同嘉欣只係出席公司同事嘅生日會，我同嘉欣同埋一間公司，一齊食飯好正常，影張相就復合，咁我𠵱家同你合照（黎明搭着一名女記者肩膊），係咪代表我哋重新開始？我同佢冇乜前面嘅愛情，但喺工作上係好朋友，成日都會通電話，我因為大過佢，所以我當佢係妹咁。」
記者再問Leon與徐子珊的緋聞，他照例否認，但問到他與拍拖七年的舒淇是否已分手？他說：「我根本冇承認過同佢開始過喎。你哋幾時影到過我哋一齊先？不過我同佢的確係好好嘅朋友，得閒食吓飯係好正常。我可以話畀大家知，𠵱家我冇女朋友，我啲工作咁忙，要拍拖都唔容易，將來我有女朋友，我會出其不意咁話畀你哋知，就好似人民幣升值咁，出其不意話升就升。」
女人緣佳
楊采妮挺身維護
對於上周到內地宣傳《七》片時被指耍大牌，Leon說：「呢啲傳聞我唔會理。」甚有女人緣的他，連楊采妮都站出來為他辯護說：「Leon冇耍大牌，我反而覺得佢好照顧大家，好似今次喺內地做宣傳，遇到好多突發事，佢都可以擺平，令我哋可以早啲收隊走人。」
此外，與章子怡相戀的霍啟山前晚出席首映時，被記者追問為何早前與徐子淇一起去看電影？他解釋說：「呢單新聞，徐子淇都解釋過，我唔想再講啦。我同佢喺英國讀書時曾經係同學，佢係好女仔，我同佢係朋友。」
寰亞老闆林建岳在首映中被問到鄭秀文（Sammi）何時正式宣布加盟東亞娛樂，他表示：「我同Sammi一直有保持聯絡，呢啲等稍後安排。不過我可以肯定同大家講，Sammi身體好好，絕對冇生癌，佢對呢啲惡意報道好麻木，唔會再為呢啲報道唔開心，呢排佢忙緊幫《長恨歌》錄主題歌。」
採訪：馮美茵、張俊銘
攝影：陳慧安、陳偉權
