AnaR.、Rosemary、任葆琳和胡敏珊等昨日在紅磡出席泳衣騷，眾人大談水着之道。AnaR.很喜歡穿比堅尼游水，香港和美國有二、三十套，但她透露因暴肥十磅及怕被偷影，所以今季會絕迹泳衣天橋及香港海灘。
配飾品牌Steela+Steelo昨日在紅磡舉行夏季泳衣及首飾騷，由青春外籍女模及一名穿乳環的男模示範。名模陳嘉容首次出任形象總監，好友AnaR.和Rosemary等到場打氣。
飲暖水減肥
AnaR.自言今季將絕迹泳衣騷，她說：「我早前幫男友嘅雜誌影咗輯泳衣相，不過行騷就最快要下一年，因為我今年肥咗十磅，要操弗啲先得。我喺佛羅里達州長大，嗰度近海，我好鍾意着比堅尼游水，香港同美國加埋有二、三十套。」
但AnaR.謂在香港海灘就可免則免，她說：「我揀去峇里同馬來西亞多啲，因為水清沙幼，又冇狗仔隊，喺香港着三點式好唔安全，好易俾狗仔隊偷影，佢哋又focus你個胸、對腳嚟批評，令人好唔舒服。」AnaR.又謂開始喝暖水減肥，一周成功減去兩磅。
怕曬匿水底
Rosemary早前則破例在淺水灣暢游，問她可有給泳客認出或偷拍，她說：「冇，我只係游咗半個鐘，重因為怕曬長期浸喺水底，所以冇人認到我。我平時都少去沙灘，不過今次主要陪外國返嚟嘅細佬去玩，而且我係着一件頭泳衣！」
此外，到場的有胡敏珊、任葆琳和郭少芸，其中郭少芸以性感bratop上陣，她對此說：「我以為喺池邊舉行咪咁着，同埋我近期收身成功，減咗十磅準備着比堅尼拍纖體廣告，所以唔介意咁着。」
採訪：JessicaNgan
攝影：EdwardChou
