講到動作片，相信好多人都好懷念七小福呢個班底，成龍大哥啲戲大家睇得多，其實洪金寶嘅戲都好受影迷歡迎，有見及此，電影公司最近就幫三毛推出咗一套《洪金寶動作系列》嘅DVDBoxSet，呢套BoxSet嘅三套片無論畫面同聲音都經過數碼修復，質素十分之唔錯。
記者：梁瑋瑜
DVDBoxSet$239
查詢：洲立影視（24188896）
呢套DVDBoxSet有三隻DVD，包括《鬼打鬼》、《林世榮》同埋《雜家小子》，配有杜比5.1同埋dts音效，話明係動作系列，呢三套戲都係三毛出名嘅動作片，今次重特別收錄咗洪金寶訪問片段同埋剪輯咗洪金寶電影片段嘅MV，非常值得Fans珍藏！
《鬼打鬼》茅山大戰
《鬼打鬼》係一套集合靈幻、動作、幽默於一身嘅電影，重係1980年全年票房之冠嘅電影，份量絕對唔嘢小，故事主角係洪金寶飾演嘅張大膽，成日誇口自己唔怕鬼怪，可惜有個紅杏出牆嘅老婆，重夾埋個姦夫請咗個茅山大師嚟害佢，好彩張大膽都黑唔晒，得到呢個茅山大師同門師弟拔刀相助，於是兩幫人進行大鬥法，中間發生咗好多搞笑事，當然唔少得洪金寶肉搏惡鬼呢啲精采動作場面啦。
《林世榮》大戰堂主
《林世榮》呢個名相信大家都好熟悉，今次洪金寶就飾演黃飛鴻呢個弟子林世榮，平日鍾意路見不平、伸張正義，不過有一次唔小心得罪咗惡人幫五龍堂，其後五龍堂堂主獨子擄走咗世榮嘅靚女弟婦，世榮趕去營救，但不幸地俾五龍堂嘅人插贓嫁禍佢姦殺堂主嘅養女，惹到一身蟻，究竟最後林世榮點樣甩身呢？《林世榮》全片都有好多動作片段，尤其是林世榮大戰五龍堂堂主一場戲，一定唔可以錯過。
《雜家小子》武技好睇
最後呢套《雜家小子》係1979年嘅作品，今次梁家仁同元彪嘅戲份都好多，佢哋飾演兩個成日偷呃拐騙嘅口靚仔，因為唔識武功俾人打到周身傷晒，後來跟咗個高人學武，靠住呢啲武功變本加厲咁去呃錢，之後發現呢個高人原來都唔係善男信女，佢捉咗梁家仁，於是元彪就去咗搵秘密收埋高強武藝嘅肥乞丐洪金寶拜師，喺努力之下終於打敗咗呢個壞師傅。記者睇完三套戲之後認為呢套《雜家小子》嘅武藝最好睇，而且人物方面都比較熟悉，值得推介。
