近年我們經常講及提高電影的質素，其實質素有很多方面，除了劇本的內容還有很多技術性的層面。
美術方向是其中一個很大的題目，咁到底美指係做啲乜？我估有一部份做緊美指嘅人自己都唔知。經常都會聽到有導演投訴話唔知啲美術指導搞緊乜，亦都經常聽到啲美術指導話唔知個導演要求啲乜，我聽到自己都會諗係咪真係咁難搞？
其實一般市場上可以看到的劇情片並不需要一個太離奇的美術方向，大部份的劇情片都是建立在一個寫實世界上。所有的美術方向都應該依據劇本內提供的背景、角色的性格去決定。就以服裝來講，一個文員的角色應該大有機會到G2000買西裝返工，便服就梗會有一兩件佐丹奴。但係唔好以為咁做一定掂，因為電影係一個唔現實嘅世界，我哋可以美術性地處理這個文員角色，令佢穿起G2000嘅西裝睇起上嚟好有希望咁嘅樣，就好似件西裝喺Joyce買一樣。
但係有時現實世界更加唔現實，因為如果個文員角色由天王巨星來演就完全不同了，天王巨星或者佢旁邊啲人會同美指講要買Prada嘅西裝，巨星都知道自己係演文員，但係佢更加知道自己着Prada會好睇啲。久而久之，大部份嘅美指一遇到有巨星演出嘅戲都會自動買套Prada頂住先，其實係因為怕咗佢。咁導演睇到張單無端端買咗套Prada西裝就梗係唔明個美指搞乜啦。
以上只係一個虛構故事，現實係近年電影無法培育到一班有睇法的美指，因為我哋冇足夠的空間同錢去畀佢哋運用。