林嘉欣自公開與陳光榮的戀情後，事業人氣不但沒有受影響，工作量反而增多，她亦無懼師妹劉心悠的威脅，因為嘉欣深明每人總有過人優勝之處，如果驚只是對自己冇信心，而且她跟隨舞台大師詹瑞文學演戲後，更自覺演技大有進境。
事業篇：學演戲尋突破
電影《阿嫂》自開拍以來，一直是非不絕，先有男主角元華同黃秋生不和、秋生在高雄拍攝電影期間被指離群自處，另外兩位女主角林嘉欣及劉心悠，更似乎擺明車馬要爭星皓一姐地位，電影未上映，花邊新聞已經可以媲美電影情節。
「我哋唔係好熟」
日前嘉欣在銅鑼灣接受本報訪問，對於與師妹劉心悠的是非瓜葛，嘉欣坦承與對方的關係只是普通同事，亦從不覺得對方給予自己威脅，她說：「我哋冇不和，因為唔係好熟，只係一般嘅同事關係。我好清楚每人都有自己嘅長處，一定會有人靚過你，身材好過你，如果你驚，只係對自己冇信心，我覺得之前啲不和傳聞，係我同佢關係卻步嘅其中一個因素，因為感覺好尷尬，冇理由啲新聞出咗後，我哋攞嚟討論，所以大家咪當冇嘢發生。」
曾拒接拍《阿嫂》
然而早前嘉欣和李心潔合作拍《救命》後可以成為好友，為何與劉心悠卻不能呢？嘉欣就此說：「都唔同，因為我同心潔都係會享受生命嘅人，同埋我哋大家都鍾意做戲，係真係鍾意嗰種。」據知電影開拍初期，嘉欣的角色並不屬意由她演出，有指因為劉心悠的演技未夠班孭飛而急忙加入嘉欣，才會有今時今日由六位影帝拱照兩位女主角的局面。嘉欣對此表示：「我最初係唔想接呢個角色，因為有啲劇情我唔明白，後來阿旦（鄭丹瑞）搵我，佢好有誠意咁同我解釋，重同我講喺角色上有好大發揮，佢講完後，我覺得冇可能唔接。」
而自跟隨舞台大師詹瑞文學演戲後，嘉欣自覺演技大有進步，早前曾志偉公開批評劉心悠的演技，那麼身為師姐的嘉欣有何看法？她說：「我覺得對佢好可惜，難得有一個機會，應該畀多少少時間佢，因為語言係一個大障礙，顧得對白又顧唔到做戲，所以佢應該學好廣東話先。」
嘉欣去年被踢爆與音樂人陳光榮拍拖，問她公開戀情對事業可有影響，公司又有否給予壓力？她說：「公司冇畀壓力，但有叫唔好成日掛喺口邊，因為唔想將焦點放喺感情上；至於事業就唔覺有影響，相反工作重多咗，不論廣告同電影，公司亦畀好大自由度我去揀戲接，好似最近嘅《詭絲》同《怪物》呢類型嘅電影我以前都係唔會接嘅。」
不再拘泥角色
由《阿嫂》入面扮演一個復仇女人，到《詭絲》及《怪物》的懸疑驚慄，其中《怪物》內的嘉欣更要倒模化成一個令人一望生畏的恐怖女人，嘉欣坦言挑選此類型的角色是想尋求突破，她說：「以前會好拘泥自己係一個女仔，唔夠open去接受呢類角色，所以缺乏新鮮感，不過同阿詹上堂後，我重新搵番自己，知道表演係乜，有好大得着。」
撰文：馮美茵
攝影：仇志德
化妝：KeiKei
髮型：Hin@IlColpo
場地提供：銅鑼灣G.O.D
