估唔到係咁意寫吓《賓架之襪》（七月二十日），都會引起注意，幾位老友打電話嚟問隻澳洲襪之牌子。其中一位老闆級人馬話：「對襪向下滑移，露出小腿肌肉，確係有啲肉酸，我買過好多名廠名牌男士襪，着十次八次，就會發生呢個現象。快啲講，澳洲襪係乜牌子，等我電郵雪梨老友去買，DHL返嚟。」有此方便，不如代左丁山買埋啦。
講完電話，行經遮打大廈「行人轉運站」，碰到賓架Ｌ趕住行去置地廣場，俾佢一手捉住：「連我對襪你都寫！」算嘞，開吓玩笑啫，無傷大雅。跟住去到中總會員俱樂部，赫然碰到銀行界老前輩ＶＰ黃。今日啲銀行大把ＶＰ（副總裁），未做到ＶＰ級數嘅，點可以叫做賓架？讀完MBA入銀行，五年之內未升到ＶＰ，醜醜哋喎。三十年前就唔同，升到ＶＰ，已經夠鐘等退休，成個中環，所有美資銀行之中，只有一位ＶＰ，就係黃前輩，佢好似係家族嘅第三代銀行買辦，銀行取消買辦制之後，銀行就畀個ＶＰ銜佢，所有後輩都尊稱佢做ＶＰ黃。
ＶＰ黃已年過八十，從外地返嚟香港長住。黃太不幸啱啱仙遊，積閏享壽八十三歲，七月二十七日上午在沙田大圍寶福山出殯，昔日曾在ＡＥ跟隨ＶＰ黃者，或可留意。賓架Ｒ問眾人：「邊個去寶福山呀？不如大家一齊去。」前輩Ｔ立即話：「閘住，去就你自己一個去。」賓架Ｒ又講：「我同你去囉。」前輩Ｔ喝住：「喂，唔好講個去字，幾十歲人，你明唔明白『佢去咗咯』呢句話點解？」眾人恍然，不禁失笑，賓架Ｒ講：「怕咗你，邊個參加呀？」
前輩Ｔ為人風趣，最叻捉字虱，又識得多各地方言嘅諧音，改名之前，最好向佢問清楚。一次我哋講及泰國有間「亞洲××」，佢話：「潮州話講亞洲，就係『吔蕉』，做銀行唔好吔蕉呀！」