《妙手仁心Ⅲ》演員拉隊捐血<br>吳啟華誇口收視勝長今

《妙手仁心Ⅲ》演員拉隊捐血
吳啟華誇口收視勝長今

吳啟華和黎姿等演員昨日出席無綫重頭劇《妙手仁心Ⅲ》首映會,眾人對該劇收視信心十足,吳啟華更誇下海口謂必破韓劇《大長今》的最高收視,但當他得知《大》劇最高收視為五十點後,即說:「吓!咁高、有冇搞錯!」

吳啟華、陳豪、林保怡、黎姿、吳美珩和邵美琪等昨日在尖沙嘴出席無綫新劇《妙手仁心Ⅲ》首映會,該劇將於後日晚上十時首播。
問眾演員對《妙手仁心Ⅲ》的收視有沒有信心,他們異口同聲稱該劇有一定支持者。問吳啟華可有信心打破韓劇《大長今》的最高收視時,他自信地說:「實得啦。」

「唔知長今咁犀利」

當告知《大長今》最高收視為五十點(約三百二十八萬人次)時,他說:「吓!咁高、有冇搞錯!其實我一直都唔喺香港,都唔係好知《大長今》咁犀利。」同樣信心十足的吳美珩說:「我好鍾意睇整容嘅節目,而《妙手仁心Ⅲ》入面嘅手術場面都好逼真,所以我覺得一定會好好睇!」
除此之外,眾演員還被安排於下周四(二十八日)在將軍澳電視廣播城捐血,問劇中主要演員曾否捐過血時,大部份均稱未捐過,只有陳豪和吳美珩表示捐過血。黎姿更直言怕痛不敢捐血,她說:「我好怕痛,少少都忍唔住。我唔驚血,但好驚針,所以到時捐唔捐都要睇情況。」

林保怡怕血污糟

至於林保怡則笑說:「我驚我啲血唔乾淨嘛。」說罷他立即解釋:「其實係因為我曾經入院吊鹽水,遇到一位經驗淺嘅護士幫我插針,搞到我手背又瘀又黑,重腫咗一大嚿,自此我就對針有些少恐懼,所以我暫時都未捐過血。不過,若然到時真係要我捐,我諗都冇問題嘅,我有年年驗身,身體都OK!」
而吳啟華則透露剛由上海趕返香港出席該活動,晚上會飛返內地繼續趕拍由上海和日本片商投資的恐怖片,故捐血當日他未能出席。
採訪:王崇穎 攝影:陳偉權

一班《妙手仁心Ⅲ》演員身穿醫生袍出席首映會,十分醒神。
(左起)陳豪、黎姿、吳美珩、林保怡、陳宇琛、邵美琪、曹永廉、吳啟華

身穿護士制服的姚嘉妮,呼籲巿民要愛惜生命。

(左起)陳豪和林保怡密密斟,站在他們身旁的吳啟華似乎甚冇癮。