無陰功牛牛子孫根俾人狂踩

逛米蘭本身就似逛一個巨型博物館，商場跟車站，壁畫與雕塑周街係。著名的血拼地GalleriaVittorioEmanueleII（LV、Prada、Gucci統統雲集於此），人稱「米蘭的客廳」，華麗的巴洛克氣派彷彿是整個米蘭的縮影。除了中庭那幾面代表世界各地的壁畫，及地板那真實版米蘭市內地圖外，必看馬賽克鑲嵌的，十二個星座圖中的公牛圖。
攝影、記者：陳慧敏

■哎呀！阿妹你去咗邊呀？

■籮仔吉吉，好盞鬼！

正宗示範
■呢位阿叔單腳迴旋好有勢，而且只有腳跟掂地，非常正統。

■轉得半個圈，幫你唔到！

■着高跟鞋，注定失敗！

■屁股轉，唔計數！

■有姿勢有實際

輪住碌地有金牛照

傳說只要用腳跟踩住牛睪丸，成功順時針轉一圈，而腳跟又無離開牛是為吉星照行好運，三個圈就更加呼風喚雨，引得路人旅客無不轉過至安樂。可憐那不過四、五塊階磚大的牛牛子孫根，經年來已被踩到深深凹陷，莫講話轉，用腳跟企定都不容易。眼見個個轉不到一個圈已經一仆一碌。小記親身試轉，出腳口訣準！快！定！衰咗。不是中途想仆就是腳已移位（目標太細喇！）不過淨睇人仆都非常過癮，有冇金牛照都冇所謂啦！

■可憐的公牛，重要的下半身已被遊客踩到完全凹陷，可知它多旺場。

■GalleriaVittorioEmanueleII以金屬和玻璃建造，為了慶祝米蘭擺脫外國勢力，及新意大利王國的統一而建。

WhiteNight全城玩通頂

意大利夏天日照時間極長，周時玩到9點幾依舊陽光普照，既然如此，索性玩盡佢。由去年開始，ComuneDiMilano就於每年6月其中一個星期六（按活動安排而定），米蘭跟羅馬會一同舉辦一夜WhiteNight。很多地方都會有小型巡遊，或者BandShow，而餐廳、商舖都會由每日11:00am一直營業至第二朝6:00am，地鐵更加通宵營業，正宗徹夜狂歡。奉勸各位撞正WhiteNight就要搏命玩盡佢，皆因第二朝，好多商店、跳蚤市場、FreeMarket都會休息，邊度都唔使去。今年的WhiteNight已於6月18日舉行，明年日期未定，各大滾友請密切留意網上行情喇！（www.comune.milano.it）

■出發前他們都躲在Galleria後面練習。

■參加巡遊的有小學生有初中生，最小一個只得5歲㖭呀！

■阿仔表演媽媽更緊張，掛住幫阿仔整理儀容。

周街遊戲任玩

WhiteNight正日，除了表演外，一條大街還擺開40個擂台陣，原來是玩具公司宣傳，免費給大家玩各式新款BoardGame，重有專人教玩。有人認真沉思，有人成班Friend起哄，成大半粒鐘先玩完一鋪都冇所謂。其實除了大時大節，大街上都會有好多公司在此舉辦Promotion，試玩或禮品任攞。所以記得行街掃貨之時，都留啲時間睇吓有乜筍嘢玩，或者行到攰都可以唞唞。

■有人玩得非常認真，小記還以為是正式比賽。

■直至見到這對「教極唔識」的甩毛小婦人後，才知道這些是免費的宣傳活動。

街頭SNAPSHOT

■周時有小丑在街邊幫小朋友扭波波，每個1歐元。

■天時暑熱，街頭買支水都要15歐元，要好好珍惜街頭飲水器，婆仔數都係咁話！見水即飲！

■有人在街頭自跳鬥牛舞，對腳扮晒馬蹄般跑，向住路人繞圈子。

出門提一提

簽證：持香港特區護照毋須簽證，持BNO須簽證。查詢：25220033（意大利駐港領事館）

機票：乘以色列航空經特拉維夫，轉飛米蘭，來回經濟客位票價$4,650起。查詢：25198088（星晨旅遊）

貨幣：1歐元約兌9.45港元

求助電話：068848186（中國駐意大利大使館）

鳴謝：HotelMediolanumMilano