陳柏霖日前喺台灣拍攝新劇《單車上路》，因被指遲到而俾場務宋雲青毆打，噚日柏霖喺父母陪同下開記者會。柏霖戴住墨鏡亮相，咁啱佢姑姐噚日朝早不幸過身，所以佢同屋企人都好嚴肅，喺記者會上好簡短咁交代件事之後，就趕去殯儀館處理治喪事宜。
眼傷已痊癒
柏霖首先感謝各界嘅關心，佢話右眼嘅傷勢已近好番，因為情緒受影響先至辭演，柏霖又話：「我真的很喜歡該劇，但因為這件事影響到心情，目前仍無法調適過來，無論如何，我對導演仍然十分尊敬。」
原來陳媽媽係第一個主張柏霖辭演嘅人，佢因個仔俾人打而覺得好心痛。而陳媽媽又因幫個仔抽兵單時抽到入海軍陸戰隊而難過，因為呢隊兵操得好辛苦喎。陳媽媽又澄清：「柏霖有去抽兵單現場，只是他一夜沒睡，我讓他在車上休息，由我下車幫忙代抽。」陳父雖然冇發言，但佢嘅眼神始終冇離開個仔，疼愛之情溢於言表。
拒簽道歉書
片商「台灣聯通」嘅執行長陳亮光話，今次突然要易角，佢哋初步估計會損失百萬新台幣（約二十五萬港元），佢唔排除採取法律途徑向宋雲青索償。而宋雲青噚日再三強調已經第一時間同陳柏霖道歉，佢話：「公司曾經要我簽一份道歉書，但因為內容我無法認同，所以我拒簽。」宋雲青重話山水有相逢，奉勸大家留有餘地，日後好相見喎。
