人民幣升值2.1%，昨日大市即刻立立亂，噚日經紀黃品題的中國國航（753），雖然都升咗4.8%，收2.725元，但計落就點都唔夠東方航空（670）同埋南方航空（1055）郁得咁犀利，東航昨日最高見1.42元，收1.36元，升6.2%，至於南航就最高見過2.70元，收2.475元，升4.2%。
經紀黃就話，查實除咗大陸航空股會受惠於人民幣升值外，持有大陸資產的股份亦會得益，例如被拋售多時的大陸地產股，就嚟個鯉魚大翻身，例如華潤置地（1109）升13.7%，收1.66元，至於即將公布業績的上海復地（2337），都升咗4.4%，收2.325元。
但經紀黃就話最鍾情新簇簇的富力地產（2777），佢話隻股響大陸地產股最低迷的時間上市，上市時已經係以下限的10.80元定價，好彩幾個大芬坐晒啲貨，所以上市以來股價一直硬淨，家陣氣氛好番咁多，有隨時發難的條件。
富力昨日都升咗3.1%，收11.55元，成交股數398.9萬股，金額4547萬元。
慕容小初