近排暑假咁多猛片，大家一定過足戲癮，XBOX亦乘勢推出幾隻改編自荷李活電影嘅遊戲，讓各位享受電影之餘，重可以親身投入電影世界。今個星期輪到《神奇4俠》喺XBOX「上畫」，遊戲畫面非常漫畫風格，再加好多激鬥場面同Boss級敵人，都跟足原著比電影版重齊，電影Fans冇理由唔玩！
記者：許福合
好多由電影改編嘅遊戲，都會大量用番電影曾經出現過的場面，《神奇4俠》亦都唔例外，若果睇完電影玩Game，就會發現好多場景都似曾相識，唔同嘅係今次可以喺遊戲同一個場景打個痛快，而未睇過嘅更好似預先睇戲一樣喇！
變身神奇超人
XBOX版《神奇4俠》始終係遊戲版本，同電影相比，Cut咗好多交代劇情嘅文戲，只係留番動作場面讓玩家享用，但對喜歡打鬥動作嘅玩家，就應該唔會失望。遊戲當然以4位「大俠」做主角啦！4位主角各自擁有唔同特技，神奇先生可以扭曲伸延身體，Susan就可以隱形同控制力場，另外2個外形至為出位，Johnny可以操縱火嘅火人，Ben就係大力士石頭人，無論喺電影定遊戲內，4位擁有嘅技能都係出神入化！遊戲版本更會加入好多連電影都無出現嘅漫畫原著角色，讓玩家有更多Boss級對手可挑戰。
角色交替控制
設計咗咁出位嘅人物做主角，若然只可以控制一個就太單調，喺故事模式中，初期就已經有機會同一個場景內轉換角色使用，不過玩法就唔係任選角色，而係根據劇情進展，有機會同場有2名主角出現，玩家就可以用手掣上左Joystick自由轉換角色，次數無限。當轉換角色後，原先的角色就會交由電腦控制，有怪打怪，或跟住玩家移動。當去到遊戲後期，更有機會同場出現4名角色，操作技巧重點係因應敵人而轉換角色，事關每名主角都擁有唔同技能，部份近戰較為出色，亦有遠程技能，如何靈活運用就考驗玩家智慧。另外Susan具備隱形技能特別好用，能走近敵人才發動攻擊，構思戰略時要好好考慮。
學習升級絕技
玩此遊戲時有個特點，就係差唔多整個手掣嘅按鍵都有機會使用，皆因技能真係多到數唔晒。根據資料顯示，每名角色都至少有40個動作同技能，而且隨着遊戲發展，更有機會學到新招，同時，招式技能都有級數之分，對敵時會獲得分數，夠分數就可以選擇升級項目，因為到後期對付Boss級敵人時，單挑絕對唔係良策，並且會加入團體戰模式，玩家可因應情況對唔同角色下達動作指令，所以為咗發揮最高效率，學習技能應先選擇破壞大嘅招式。對敵時亦要留意，4位主角使用絕技時，都會持續咁減MP，所以當一位角色無MP時，換人攻擊亦係一個好方法。
同場加映
同期電影遊戲《荒失失奇兵》
除咗《神奇4俠》之外，XBOX近期重有隻《荒失失奇兵》都係由電影改編，故事方面更係完全忠於電影，玩家可以操作主角獅子同埋佢幾個朋友，由城巿玩到森林，遊戲一共分為11個關卡，並同時設有好多迷你遊戲同隱藏版面，玩法好多。每名主角嘅技能隨住遊戲發展，會不斷有新招學習，玩落好有趣味，加埋畫面生動趣怪，好啱一家大細一齊玩。
