人民幣升值，港股受刺激，恒指彈升166點。滙控（005）、中移動（941）、長實（001）與和黃（013），總共貢獻升幅103點。
中石化C輪4561：中石化（386）升0.175元，升幅5.7%，中石化C輪紮紮跳。龍虎榜10隻窩輪，有7隻係中石化C輪，升幅由115%至511%。
最巴閉嘅4651，由1.8仙飛上11仙，有近20球轉手，下周二最後買賣，溢價0.3%，槓桿率29.6倍（有效25.5倍），引伸波幅18.2%，得兩日玩，唔係個個啱。
中石化C輪正路之選係4561，9月尾夠鐘，輪價28仙，溢價0.9%，槓桿率11.6倍（有效8.9倍），引伸波幅25.2%。數據相當唔錯，但昨日彈升73%，最好等有回吐之時先至上車。
九倉C輪3846：龍虎榜上，有隻九倉C輪3510，收14.3仙，升170%，成交金額7萬幾。8月2日最後買賣，溢價0.2%，槓桿率21.2倍（有效20.3倍），引伸波幅12.9%，時日無多，難買賣。
九倉C輪3846收53仙，升33%，10月尾到期，溢價0.2%，槓桿率5.7倍（有效5.3倍），引伸波幅26.2%，呢隻數據靚啲，但成交金額唔夠1百萬，買賣亦嫌唔易。
九倉係大藍籌之一，雖然交投唔算巴閉，但都唔應該得3隻C輪掛牌，更加唔使搵有P輪掛牌。發行商生意爭崩頭，點解唔發多幾隻九倉C輪畀人賭吓？
章盛