保險Ｃ幾個月前在新加坡買咗樓，上個月特登去新加坡小住一星期，感覺良好，猛話新加坡好舒服。家電Ｙ就對保險Ｃ講：「你趁低吸納，故此話新加坡環境好。我喺九四年摸頂，買入新加坡物業，至今仍然係負資產，輸到服就真。」
新加坡地產價其實喺九四年向上衝，要到九五年尾先至達到高峯，故此家電Ｙ唔算摸頂，只係高價入貨啫。九八年第四季，新加坡私人樓宇價格係一百嘅話，九五年第四季就係一百八十，家電Ｙ於九四年入市，指數係一百五十左右，現時指數係接近一百二十，家電Ｙ仍然虧本兩成；與新加坡比較，香港今天嘅樓價，已回復九四年水平，比九七年高位仍然下跌四成幾（根據城大中原指數）。
雖然至今未賺過錢，家電Ｙ就話新加坡私人樓宇嘅圖則、設計、外形、用料，都比香港優勝，如果想去新加坡發展，喺當地置業，甚有價值，起碼唔會覺得俾人呃秤先——即係買二千呎建築面積嘅豪宅，可以鋪到一千三百呎（平方呎）嘅地氈（稱為carpetarea），發展商已算有良心。不過喺新加坡買樓作投資用途，家電Ｙ就期期以為不可，佢話：「新加坡人民有八成幾人住響公共屋邨，啲公屋又鬼咁靚，好過香港啲公屋居屋好多倍，新加坡人點會炒私人樓宇呀，冇人炒，升值就比較難，除非國內同胞轉移陣地，唔掃香港樓，改向新加坡掃貨。」
咦，會唔會呀？新加坡政府於七月十九日宣布四招，刺激樓市：（一）供樓可以借九成（現在借八成）；（二）一成首期之中，一半（即半成）用現金，半成可以用強積金撥付；（三）外國人到新加坡買樓，以前動用星紙二百萬元（約港幣九百二十萬）就可以獲得居留權，現在用一百萬星紙就得；（四）外國人可以買矮過六層嘅物業。第三招對中國大款好有吸引力，隨時可以炒起新加坡樓市。