八方噚日寫資深傳媒人施立儀離開《信報》，唔再寫「余錦賢」及「范中流」兩個專欄，搞到施小姐俾人call爆機，真係唔好意思。
八方亦俾人猛咁追問內情，呢樣嘢都係由當事人自己講好。不過，《信報》高層來電要求澄清，第一，佢哋「范中流」個專欄係集體創作，唔會因為一個人走叫停，但係唔排除要唞唞暑；至於《信報》嘅政治立場就冇變；佢哋話，施立儀同老闆講，已經做咗咁耐好攰，所以想換吓生活方式。而林山木同林太最近好積極想搞好張報紙，要請人㖭，重問八方有冇人介紹。
講起「范中流」個專欄，八方睇咗成十年。記得開初係范卓雲負責，林靄純亦寫過一陣，之後八九年都係施立儀執筆。魯迅有詩云：破帽遮顏過鬧市，漏船載酒泛中流。「范中流」呢個筆名，當典出於此。其實敢用呢個名都唔簡單，事關寫完呢三個字，就要「橫眉冷對千夫指」了；施立儀拜拜之後，邊個會接棒呢？
傳真︰2623-9278
電郵︰[email protected]