煲呔想重組行會，加入重量級人馬，呢個喺選舉期間已經講得好白，不過，要搵有斤両之人，真係談何容易？
八方聽聞煲呔同肥龍正為此大傷腦筋，因為德高望重嘅人才實在買少見少。以銀行界為例，以前就有浦偉士、利國偉式嘅人馬畀你選，𠵱家滙豐得最近升咗主席位嘅鄭海泉；而恒生嘅柯清輝比較後生，當然搵鄭或柯入局最大障礙係滙豐始終係英資，政治不正確。咁搵中資中銀本來最啱key，但係見過鬼怕黑，劉金寶好哋哋忽然俾人拉咗冇得返香港，真係好得人驚。
所以最後都係搵番本地華資安全啲，華資當中好似只有一個李國寶。寶哥哥義助煲呔參選成功，本來就要賞，既然係同聲同氣，委佢入行會最好不過，但係問題係佢衰大口，有名你叫，「大口寶」是也，呢個正係寶哥哥可愛之處，亦係佢嘅死穴，到時行會消息亂飛，煲呔點頂得順？當然，寶哥哥做人冇所求，都唔想人哋話佢博入行會先幫煲呔，結果最後睇怕都冇佢份。
李業廣夏佳理係上算
八方分析咗咁耐，只係得出一個結論，就係特區人才難求，有份量嘅人才更難求。銀行界冇人啱，惟有叫做開燕梳嘅陳智思頂硬上，佢伯爺哋話晒都係泰國盤谷銀行嘅大老闆。
冇銀行家，只好搵有金融背景嘅人撐住，任總唔會入行會，反而有人重提李業廣，話佢老哥仍然寶刀未老，有魄力，又有服務社會之心，加上佢分分鐘由港交所跳去證監會，不如搵番佢出山，震住吓。李業廣係李超人之友，煲呔分分鐘投桃報李，唔好俾八方估中。
另一隻黑馬係馬會主席夏佳理，佢有法律背景，同班議員又熟，又懂立會運作，又有自由黨淵源，真係好適合做行會成員，加上佢同肥龍同唐唐都有偈傾，非常合拍。
至於恨到出口嘅田少，聽聞煲呔十分投鼠忌器，佢有跣過阿董嘅輝煌歷史，煲呔都驚搞佢唔掂。
行會堅持要保密同集體負責，民主派人士應該冇機會加入，煲呔佢哋諗緊，會唔會有一個類似當年張健利式嘅人物，既受大狀同民主派尊重，又較同情政府，如果你知有咁嘅人，就即管話畀佢哋知喎。
傳真︰2623-9278
電郵︰[email protected]