他與200蛇蟲同居

喜好呢啲嘢，無得解！鍾意養爬蟲類寵物嘅人，想特別啲、有性格啲亦好似係理所當然，唔想多講！不過亦有出乎意料嘅事，就係隨手攞毛茸茸蜘蛛、惡毒蠍子上手玩嘅Neo，見到曱甴竟然會彈開九呎；重有，Neo都係正常人，一樣想養可愛狗仔，但選擇養命硬冷血爬蟲類，竟然係因為覺得人狗交情過份深厚親密，怕寵物離世之日會傷心過度。原來寵物冷血，人卻愛心滿溢！
記者：馬慶武
攝影：伍慶泉

Neo話唔係隻隻蜘蛛都拎得上手玩，至於點樣分？「都係憑經驗，再睇吓係咩種，其實都要博㗎！因為種類唔代表一切，好似我手上呢隻巴西黑，好多人都話好惡，但我呢隻就好馴！」

粗略估計，家藏蜘蛛100隻、蛇14條、壁虎60隻、甲蟲一對，加埋新寵烏龜、舊愛蜈蚣，與過200隻爬蟲同居。Neo除咗係爬蟲專家，重係「砌積木」專家，因為Neo屋企唔係大森林，所以佢要花心思將每一隻爬蟲嘅飼養缸叠高砌好，用盡空間。可惜Neo唔希望屋企曝光，所以拍攝不到爬蟲城堡呢個壯觀奇景。不過今次Neo都帶咗9隻「控制到」嘅爬蟲嚟影相，用一個大膠袋裝住九個箱，一嚟到公司，已經露咗兩手「砌積木」奇技。

■Neo帶嚟嘅九隻爬蟲，佢話呢9隻最乖，而且影慣相，應該可以控制到喎！

■兩隻蜘蛛影合照有一定風險，因為隨時打交打到甩腳，最肉痛就係主人Neo。

■Neo常備長短鉗，用嚟對付一眾惡毒爬蟲。

■留意隻箝，Neo特別喺尾部加上膠套，令到夾蠍子時唔會跣。北非肥尾蠍上年喺全球總共毒死咗6百幾人，喂，箝實啲呀！

■Neo對付蜘蛛嘅必殺技，就係從上方將蜘蛛用手「吸」住，屈埋晒佢8隻腳。

呢隻10吋大亞馬遜食鳥蜘蛛連Neo都唔夠膽落手玩，因為佢有一對兩厘米長毒牙，筆者聽到呢度，即彈後兩呎自保！

就係呢隻豹紋壁虎最得Neo歡心，雖然佢話冇幫佢哋改名，但係拍照時玩到情不自禁叫咗一聲「BB」，噢！有愛心！使乜怕醜啫！

蟋蟀一落入呢隻血腳嘅缸內，唔使一秒就得到解脫，奔往極樂世界。

白化粟米蛇超馴，Neo話佢被蜘蛛、壁虎、甲蟲都咬過，惟獨未被蛇咬過，所以大家唔使咁驚蛇喎。

Neo話蠍子好懶，可以唔用毒尾就慳番，不過可能呢隻蟋蟀掙扎得太犀利喇，所以搞到出鉗又出尾，真係辛苦晒！

蜘蛛成身毛茸茸、蠍子有殺人劇毒個身一節節核突到爆、壁虎仔四腳爬爬鬼鬼祟祟、蛇仔伸脷蠕動扭曲兼蜷縮、再加埋外形同曱甴只係一線之差嘅甲蟲，Neo通通都會攞上手玩，甚至畀佢哋周身躝都未驚過。
不過，面對細細隻冇毒嘅曱甴，Neo竟然會驚到彈起，「我覺得蜘蛛、蠍子呢啲爬蟲好可愛，但可能係細個時被曱甴躝過上身嚇到飛天，所以有陰影，好驚曱甴！」Neo話最奇怪係連用嚟餵飼爬蟲嘅蟋蟀都唔驚，就算將佢活生生支解到身首異處都面不改容，惟獨搞唔掂曱甴呢類小昆蟲。

■北非肥尾蠍傳聞係單性繁殖，Neo呢隻蠍子從未交配過，但都狂生蠍子仔，呢條就係其中一隻初生蠍子嘅屍體，影相時Neo不斷大叫：「唔好影啦，人哋死咗，畀啲尊嚴佢啦！」

■一對箝強而有力，手指都可以夾斷，小心！

■原來甲蟲係食啫喱㗎，Neo重試過趕唔切去寵物舖買，餵佢食「羅拔臣」啫喱仔，一樣做到朋友仔！

講到養爬蟲動物嘅樂趣，Neo話除咗因為佢哋兇猛惡毒，但養熟咗可以攞上手玩呢份成功感外，最開心就係幫佢哋自行配種！尤其係壁虎仔，因為養壁虎嘅行家都會幫佢哋分等級，但兩隻低等級嘅壁虎生出嚟嘅壁虎仔又可能會好靚好高等級喎，所以嗰份驚喜同滿足係不能言喻。
今日Neo就帶咗一隻豹紋壁虎出現，佢係由兩隻只值三兩百蚊嘅普通豹紋虎配種出嚟。但呢隻背部冇班點、尾部紋靚嘅豹紋壁虎就屬頂級貨色，估計起碼值五、六千蚊，不過Neo話唔會出售：「就算值咁多錢都唔會賣，因為自己配種出嚟好有感情，佢誕生嗰一刻嘅喜悅，用錢係買唔到嘅！」。

■估唔到豹紋壁虎背部無豹紋先叫靚叫值錢，呢隻尾部花紋亦屬高級靚尾。

■Neo話隻壁虎仔搭車暈車浪，要影食嘢相就要出絕招——將蟋蟀個頭掹甩嚟引佢！

■壁虎同AE86一樣可以甩尾，不過呢啲大壁虎就無屋企出沒嘅街坊壁虎仔咁易甩。