經濟好轉，唔少公司擴充，畀多些少租都冇所謂，蘭西噚日八到，紡織公司美雅歐洲海外，為配合發展，租用尖沙嘴中港城（箭嘴示），呎租比原本租開嘅單位貴四分一，面積就大咗倍半。佢新租嘅係三座二十一及二十二樓，四萬四呎，每呎十五六蚊。
地產界老友同蘭西講，美雅之前都係租用中港城，低幾層，喺十七樓，萬七呎，每呎十二蚊，但租期屆滿，決定增租樓面，所以搬去新址。
佢年前租用尖東明輝中心十一、十二樓兩萬二呎，因業主轉莊而遷往中港城。
講番今次租得抵唔抵，早兩個月前，中港城五座十九樓，以每月十八萬二租出，一萬零一百呎，每呎十八蚊。照咁睇，呢間紡織公司租得樓面多，租金平啲，都好合理，而且最重要係單位大啲，可以做多啲生意。
電郵地址：[email protected]