八方早前講過，由一班本港露宿者組成嘅曙光足球隊，終於排除萬難，前赴蘇格蘭愛丁堡參加露宿者世界盃。話咁快，個賽事已經差唔多殺入最後階段，曙光嘅成績一啲都唔失禮，唔單止唔使好似上屆嘅日本隊咁排行尾二，𠵱家個走勢重有機會喺排名十七至二十四名嘅組別脫穎而出，過吓捧盃癮。
社區組織協會班社工同八方講，唔知曙光係咪始終缺乏大賽經驗，所以抵埗後頭四場賽事只係得到兩和兩負成績，被編入爭逐十七至二十四名嘅組別，只可以爭奪呢個組別嘅愛丁堡盃。不過，曙光其後愈戰愈勇，先後擊敗法國、捷克同挪威，三戰全勝之餘重省入十七球，剩低嘅賽期只要保持水準，絕對有機會贏番個獎盃，為港人爭光。
傳真︰2623-9278
電郵︰[email protected]