因23條黯然下台，陪女遠赴美國讀書嘅保安局前局長葉劉淑儀噚晚真係現身會議展覽中心，同班舊同袍去捧黃英琦場。
原來噚晚係徐克用咗億四攝製嘅武俠電影《七劍》嘅首映禮，為香港當代文化中心創意教育基金籌款，雖然鬍鬚仔曾俊華係主禮嘉賓，但係葉劉一出現，就搶盡風頭！
只見葉太set咗個新髮型，着套DeepV晚裝，披住件披肩，花枝招展而來，記者問佢嘅近況，佢話之前喺美國忙於讀書，不過就做多咗運動同玩吓健身，食嘢就少咗，人亦健康咗。八方睇落，佢又的確健美咗，重同最近嘅天氣一樣，熱爆㖭！
早前有傳聞話佢覺得董生下台係好事，葉劉就否認講過或寫過，問佢○七年會唔會參選特首或者復出，佢就答話「唔會，我都未讀飽書。」
記者又問，葉劉返港後有冇見過榮升特首嘅煲呔，賀吓佢？點知佢好冷然咁話，「唏，佢咁忙，我唔敢打攪佢。」
咁有冇搵煲呔食飯呢？葉太仍然係嗰句「梗係冇，佢咁忙。」老董又冇搵呢？答案就好好多，「有，喺美國已經食咗。」不枉老董當年提拔佢咯。
葉劉噚晚嘅心情好靚，佢話會喺香港留幾個月先返美國，最近佢埋頭研究中國文學。咦，佢以前喺港大讀英國文學，讀莎劇，𠵱家就轉古文，真係識時務。
葉劉最後要以搵朋友，趕入場為由脫身。不過，佢阿姐睇到快完場就走先，話因為時差要早啲返屋企唞唞喎。
傳真︰2623-9278
電郵︰[email protected]
