唔係話冇人相信個市會大升，而係好多人唔相信個市會升，重有唔少人一路睇淡；在股市，絕對唔可以逆勢而行。
今個禮拜升足5日，加埋就連升8個交易日，噚日恒指上到短期上升目標14800，收14786，再大升166點，成交重犀利，衝破3字頭，去到318億元。有大成交配合，後市可繼續睇好。
下個禮拜，期指結算，大市會受大戶操控影響，筆者希望在14500至14800內整固一吓，後市升勢會更為健康。
人民幣突然宣布升值，雖只係2%，但同美元脫鈎，改用浮動滙率，市場已預期人民幣升值之勢會持續，未來一年有機會升值4%至7%。人民幣升值令本來要唞氣的港股又獲注入動力，欲罷不能。港股今個大升浪，可以升到你唔信。
人民幣持續升值，勢帶旺本港零售業，噚日零售股已齊步向上。漢登控股（448）做服裝零售，主要市場在東南亞，但集團為掌握中國訪港旅客日增對零售業帶來的商機，今年已在香港建立零售網絡，現時有6間店舖，進一步加強漢登品牌的國際形象。
同類股中PE最低
漢登（HangTan）係美國品牌服飾，產品主要市場係台灣同南韓，其餘有菲律賓、新加坡同馬來西亞。05年度（3月年結），營業額2.13億美元，升15.9%，獲利1637萬美元，升45.7%，每股盈利2.21美仙，減34.2%，主要係因認股權行使發行大量新股所攤薄，派息5港仙。集團因主要市場經營改善而受惠，同時銳意拓展零售網絡及致力控制成本，令毛利率由前的52.8%上升到54.3%，純利率亦由6.1%上升到7.7%。
漢登有龐大的零售網絡，05年3月底共有店舖450間，比04年9月底中期結算日多25間，台灣係最大市場，有233間，南韓132間，新加坡34間，菲律賓41間，馬來西亞10間。台灣銷售額1.32億美元，升13.8%，佔總營業額62.10%；南韓銷售額5075萬美元，升27.8%，佔總營業額23.8%。
現年度，集團有美國、日本同香港3個新拓展市場提供貢獻，盈利可進一步上升。成衣零售股中，漢登PE最低，吸引力亦大。
郭兆誠