昨日至話過我外母由日本嚟香港，我專登整個靚便當畀佢食，點知佢唔領我情，搞到半夜我自己食晒個便當，成朝都飽到唔郁得，就在我心情跌到谷底，佢老人家又話想食便當喎！激到我反肚。但係外母又點可以得罪呢？於是我使出拿手絕招，整個「牛肉炒青椒便當」等佢知道我有料到。因為牛肉脂肪凍咗會凝固，做便當會唔好味，所以我只係揀瘦嘅牛髀肉，重加啲粟粉撈過，等啲牛肉滑滑。將切好嘅牛肉絲加鹽同胡椒，燒紅隻鑊落豉油、麻油，用猛火炒牛肉，兜幾兜後倒埋已經洗乾淨切好的青椒、紅椒同竹笋，再炒到熟，鋪上熱辣辣白飯上邊。至於甜南瓜重易煮：將南瓜切成塊，加入日本醬油、砂糖同少許水，煮五至六分鐘就食得。最後在便當加上炒熟嘅芽菜同洋葱絲，成個便當真係又好睇，又好食。結果外母雖然冇開口讚，但係睇佢食到一粒飯都冇剩，就知道有幾好味。後來入到房，老婆話外母覺得佢冇嫁錯郎，起碼都煮得兩味，我攬住老婆大叫：我終於吐氣揚眉啦！（三十一）
老大大吉